Міколу Дзядка аштрафавалі за прапаганду нацызма

Актывіста анархісцкага руху Міколу Дзядка абвінавачваюць у распаўсюдзе экстрэмісцкай прадукцыі. Міколу абвінавачваюць у размяшчэнні на сваёй старонцы ў фейсбуку ілюстрацыі з выявай сімволікі Misantropic Division (міжнародная асацыяцыя неанацысцкіх суполак), якая 10 лістапада 2016 года (праз чатыры месяцы) судом Цэнтральнага раёна Мінска была ўнесена ў рэспубликанских спіс экстрэмісцкіх матэрыялаў. Падобныя справы становяцца звыклай практыкай у Беларусі.

Напрыклад, нядаўна ў Гродна за рэпост на 15 базавых быў аштрафаваны карыстальнік сацсеткі Вконтакте – ягоны кантэнт прызналі па-за законам ажна праз два гады пасля публікацыі.

Пікантнасць сітуацыі ў тым, што пост Міколы Дзядка быў накіраваны як раз супраць нацызма.
«Карцінка за ліпень 2016 — ілюстрацыя да паста, у якім я крытыкую людзей за тое што яны стаяць побач з нацыстамі (!!!). Фоткі прыводжу ў абгрунтаванне сваіх словаў. Разумееце шарм сітуацыі?», – тлумачыў раней Мікола сваю пазіцыю.

Паседжанне вядзе суддзя Марыя Ярохіна. Напачатку паседжання высветлілася, што хоць у пратаколе гаворка ідзе пра адну публікацыю, у даведцы, складзенай супрацоўнікам ГУБОПіК Бедункевічам Н.П., вядзецца пра дзве – у лютым і ліпені 2016 года.
Падчас пасяджэння Мікола Дзядок пацвердзіў, што сапраўды ў лютым і ліпені на сваёй старонцы ў фейсбуку размясціў карцінкі, пазней прызнаныя экстрэмісцкімі. Але ў даведцы ГУБАЗіК абсалютна не ўлічаны кантэкст гэтых пастоў, і каментары, якімі яны суправаджаліся.

Мэтай публікацый, тлумачыць Мікола, было асудзіць публічных асобаў, якія фатаграфуюцца разам з нацысцкай сімволікай, і выступіць супраць размяшчэння бел-чырвона-белага сцяга побач з ёй.

«Калі я хачу асудзіць нацызм, якім чынам я магу гэта зрабіць?Сапраўды, якім чынам можна асудзіць нацызм, калі любы ілюстрацыйны матэрыял можа быць заднім лікам прызнаны па-за законам? Калі сыходзіць з даведкі ГУБАЗіК, то трэба судзіць, напрыклад, тых, хто пускае ваенную кінахроніку по тэлебачанні, супрацоўнікаў БТ, якія дэманструюць нацыстаў і не рэтушыруюць іх», — заявіў ён у судовым паседжанні.  Пры гэтым ён прынцыпова адмовіўся выдаляць свае пасты ўжо пасля таго, як стала вядома пра распачатую справу:

«Гэта мая прынцыповая пазіцыя ў абарону свабоды слова. Я не лічу, што ГУБАЗіК мае права рэгуляваць, што я павінен публікаваць на сваёй старонцы, і не прызнаю гэтага права за дзяржавай. Спіс экстрэмісцкіх матэрыялаў – гэта чарговы наступ на свабоду слова.

Дый з практычных меркаванняў: я ведаю выпадкі, калі людзей асуджалі і пасля таго, як яны выдалялі свае пасты. Таму няма сэнсу прагінацца пад карныя структуры».
Аўтар пратакола аб адміністрацыйным правапарушэнні ўчастковы міліцыянт А. Куранкоў пацвердзіў, што ён кіраваўся выключна рэспубліканскім спісам экстрэмісцкіх матэрыялаў і матэрыяламі, дасланымі ГУБАЗіК — то бок у змест паста не ўнікаў. Пытанне наконт таго, якую ж менавіта ілюстрацыю ён меў на ўвазе, засталося адкрытым.

Адвакат звярнула ўвагу на безліч фармальных парушэнняў у матэрыялах справы: яны аформлены вельмі неякасна, з шэрагам супярэчнасцяў і недакладнасцяў. А таксама на тое, што ў дзеяннях Дзядка адсутнічае грамадская небяспека, і ён мае права ў адпаведнасці з заканадаўствам на выказванне сваіх меркаванняў. 
Мікола Дзядок і яго адвакатка папрасілі аб спыненні адміністрацыйнай справы.

У паседжанні абвешчаны перапынак для прыняцця суддзёй рашэння.

Пасля перапынку суд абвясціў прысуд — 40 базавых.

Крыніца

Міколу Дзядка будуць судзіць за пост у фэйсбуку

Журналіста «Новага Часу» і актывіста анархісцкага руху Мікалая Дзядка абвінавачваюць у «распаўсюдзе экстрэмісцкай прадукцыі»

Аб гэтым паведаміў сам Мікола на сваёй старонцы ў Фэйсбуку і заклікаў жадаючых прыйсці падтрымаць яго ў суд.
«Бязмежжа ГУБАЗіКа спыніць тут і зараз мы не можам. Але можам, прынамсі, асвяціць і выцягнуць на паверхню», — піша былы палітвязень.
Пратакол на Міколу Дзядка за карцінку ў Фэйсбуку быў складзены яшчэ ў лістападзе. Пасля справа паступіла ў суд, але была вернутая на даследванне ў Фрунзенскі РУУС. 

Сам Мікола ў каментары НЧ адзначыў, што лічыць наяўнасць спісу экстрэмісцкіх матэрыялаў атакай на свабоду слова
— Я катэгарычна супраць таго, каб забараняць пэўныя сімвалы ці выказванні. Мы бачым, што варта, нават пад добрай нагодай, накшталт барацьбы з нацызмам, нешта забараніць, як дзяржава пачынае выкарыстоўваць гэты інструмент для расправы з іншадумцамі. Гэта само па сабе абсурд — караць чалавека за пост у сацыяльных сетках, а ў маім выпадку, яшчэ і за пост, у якім я крытыкую нацызм.
У ГУБАЗіКу цэлае антыэкстрэмісцкае падраздзяленне сядзіць і мусіць неяк апраўдваць сваё існаванне. Вось яны і палююць на карцінкі ў Фэйсбуку — за нашыя грошы.

Антыэкстрэмісцкае заканадаўства само па сабе рэпрэсіўнае і несправядлівае і мусіць быць адмененае. Я не лічу дзяржаву ў праве вырашаць, што мне глядзець, чытаць і посціць. Я яе такім правам не надзяляў.

Суд над Міколам Дзядком адбудзецца 27 снежня ў 10.00 у судзе Фрунзенскага раёну Мінска.

Крыніца

На Мікалая Дзядка завялі адміністрацыйную справу за пост у Фэйсбуку

«Новы Час» паведамляе, што на іх журналіста, былога палітвязня Мікалая Дзядка заведзеная адміністрацыйная справа па арт. 17.11 КаАП (Выраб, распаўсюджванне і (або) захоўванне экстрэмісцкіх матэрыялаў) за пост у Фэйсбуку. 7 снежня ён знайшоў пратакол у паштовай скрыне. Паведамляецца, што справа была накіраваная ў суд. Аднак ці было паседжанне — невядома.

«Прыйшоў дадому і даведаўся, што Фрунзенскі РУУС ужо 2 тыдні шле мне лісты шчасця. 25 лістапада на мяне быў складзены пратакол па ч.2 артыкула 17.11 КаАП. Ізноў за «дэманстрацыю нацысцкай сімволікі». Гэтым разам я прадэманстраваў сімволіку Misantropic Division — чэрап з аўтаматамі. Смутна спрабуючы ўзгадаць, калі і дзе я гэта рабіў, я залез у ФБ і знайшоў. Карцінка за ліпень 2016 — ілюстрацыя да паста, у якім я крытыкую людзей за тое што яны стаяць побач з нацыстамі (!!!). Фоткі прыводжу ў абгрунтаванне сваіх словаў. Разумееце шарм сітуацыі?»  — паведамляе Мікалай Дзядок на сваей старонцы ў фэйсбуку.

Разважаючы пра тое, што магло справакаваць міліцыянтаў на складанне пратаколу, Мікола узгадвае свой удзел у флэшмобе #СтанемЗаЖурналістаў. Таксама гэта магло быць проста планавым мерапрыемствам супрацоўнікаў ГУБАЗіК. 

У ліпені Мікалайа Дзядок ужо быў затрыманы па абвінавачанню ў дэманстрацыі нацысцкай сімволікі — таксама ў Фэйсбуку. Тады АМАП затрымаў яго каля дома, а суддзя Ганна Буйноўская выпісала 10 базавых велічынь штрафу за карцінкі, якія высмейваюць нацызм.   Мікалай Дзядок, каментуючы чарговы пратакол, адзначае:

«Звяртае на сябе ўвагу, што на мяне мэтанакіравана складаюць пратаколы менавіта па артыкуле «Дэманстрацыя нацысцкай сімволікі». Гэта, безумоўна, сістэмная спроба дыскрэдытацыі. Бо на мяне, як на анархіста, можна скласці пры жаданні пратакол па мностве іншых артыкулаў, аднак выбіраецца менавіта гэты. Разлік тут просты: у грамадстве, дзякуй Богу, нацызм усе яшчэ лічыцца кепскім. А таму супрацоўнікі ГУБАЗіК лічаць што калі працягваць абвінавачваць мяне ў «дэманстрацыі нацысцкай сімволікі» то можна пераканаць кагосьці ў тым, што я прытрымліваюся нацысцкіх поглядаў. То бок яны лічаць  грамадзянскую супольнасць і СМІ, усіх акрамя сябе, дурнямі, якія няздольныя разабрацца, што да чаго.

Ну і, канешне, відавочны мэтанакіраваны ціск. Каб я ніколі не мог разняволіцца. Відавочна што не будзь гэтай карцінкі ў Фэйбуку, прыдумалі б нешта іншае. Ёсць грамадзянская актыўнасць — ёсць рэакцыя. Няма актыўнасці — няма рэакцыі. А карцінкі тут справа дзясятая.

Наступнае што буду рабіць — параюіся з адвакатам перад тым, як ісці ў РУУС ці ў суд. Калі суд ужо адбыўся, буду, вядома, абскарджваць рашэнне. Бо тут прыкметы ўжо не толькі судовага бязмежжа але і мэтанакіраванага пераследу».

Нагадаем, некалькі тыдняў таму жыхара Гародні Аляксандра Горбача асудзілі па тым жа артыкуле (17.11 КаАП) за публікацыю карцінкі са свастыкай, якая выкідаецца ў сметніцу.

Крыніца